U3F1ZWV6ZTc1NDI4ODE4NTkzNTZfRnJlZTQ3NTg3MDIxMTYxNTY=

الأميرة«مشهد رأيته بعين قلبى » / الأهرام نيوز

الأميرة«مشهد رأيته بعين قلبى »

 

الشاعر :عاطف محمد


عروسة الدنيا ف الجنة 

ملايكه زاينه موكبها

ولابسه توب بياض النور

وماشيه فى طريق اخضر......

 بتتمخطر

كما ملكة بتملك قلب حبايبها

وطرحتها بنور صافى 

ومغزولة بألف نسيج 

من الضحكة

وليها عبير كأنه سفير

بيفتح كل باب مقفول

وقدامها بنات الحور

وف ايديهم

 ورود من نور

ورود صافيه بتل...... تمع لمعان 

بيخطف كل عين سمت

وصلت ع النبى العدنان

وأولاد الجنان ماسكين

دوارق فيها والله ......

شراب الورد

تدوقه تدفا 

من صنوف البرد

وتتنعنش ف عز الحر

كأن نسايم الرحمن 

بقت عصافير 

ترفرف ليك 

عشان تسعد 

عشان تفرح

ويبرد قلبك الولهان

تبص لطرف فستانها

تلاقى نقوش 

إشى مرجان 

 إشى مرمر

ولؤلؤ شكله متسمر

وعنده ذهول

بيتعجب يسمى يقول

جمالى فين مع خدودها

ولون عودها

وتسريحة ضفايرها

ماحدش عدانى غير..... هيه

وأما الوش بسبوسة

طعامة بوسها

 ماتضعشى

وأما رموشها زى طاووس 

فارد ريشه عشان ياخد

كذا صورة تكون ذكرى

تلاقى فيها 

نن العين بيتعاجب

عامل صحوبيه بالحاجب

تخلى اقسى..... قلب يلين

يسلم ليها طوالى 

أنا خدام تراب رجلك

اوامرك حق سينفذ

وترفع ايدها وتشاور

سلام ياأهلى واحبابى

أنا ف الجنه سبقاكم

وهاستنى 

وهاستأذن من الرحمن

اوضب قاعدة مخصوصة

واجهزها وارتبها

وارش عطور جوانبها

واستقبلكوا حين ... تيجوا

سلام دلوقتى ده ميعادى

ومظبوط عندى...... بالثانيه

واهى دنيا

ماحدش فيها بيخلد

لكن لما بيتركها 

يسيب عمله الجميل فيها

وصدقاته 

وعلمه وحسن أخلاقه

وابن صلاحه بيطول

ف سيرته عند كل الناس

أنا جيا لك يازنجيرى

عشان نحكى ونتحاكى

يافاطمه ياأما جيا لك

معايا سلام من احبابك

يا أبو عاطف حماتى والله دعيالى

وبتسلم عليك جامد

عشان عشت الحياه حامد

وشاكر ربك الحنان

سلام يا جيران

 يا كل الصحبة والخلان

سلام يا أهلى ياعيونى

واوعو تنسوا تزرونى

وتدعولى عشان اسعد 

واكون مستورة بدعاكم

سلام ياأغلى ناس عندى

ميعادنا يالا ف الجنه 

مع الشهدا مع الصالحين

مع نبينا الحبيب طه

ف صلوا عليه

وقولوا..... أمين


***********************


***********************

تعليقات
ليست هناك تعليقات
إرسال تعليق

إرسال تعليق

الاسمبريد إلكترونيرسالة